Fakulteti Filozofik propozon për bashkëpunëtor personin e akuzuar për shitje notash

Autori:Avdyl Pajaziti

Në përfundim të vitit akademik, Universiteti i Prishtinës publikoi për herë të parë konkursin unik për angazhimin e bashkëpunëtorëve të jashtëm në procesin mësimor, për të gjitha njësitë akademike.

Në këtë konkurs, sipas burimeve të Telegrafit, Fakulteti Filozofik ka kërkuar tetë asistentë për grup lëndësh në Degën e Historisë. Pas shqyrtimit të dokumentacionit, e sipas raportit të publikuar në faqen zyrtare të Fakultetit, Komisioni i Fakultetit ka konstatuar se Arian janova, i lindur më 18.10.1985, i plotëson kriteret e nenit 178 të Statutit të UP-së për thirrjen asistent i angazhuar.

Ndërkaq në vazhdim të propozimit thuhet: “për shkak të një procedure gjyqësore në vazhdim, ku Janova është i përfshirë, komisioni vlerëson, se vendimin final për kandidaturën e tij duhet ta japë Senati i UP-së”.

Arian Janova ishte asistent i angazhuar në Fakultetin Filozofik edhe në dhjetorin e vitit 2013, kur bashkë me 12 asistentë dhe studentë të tjerë, u arrestua nën dyshimin se ka kryer vepra penale gjatë kohës sa ishte udhëheqës i një organizate studentore në UP.

Mbi Arian Janovën rëndojnë dyshimet për shpërdorim të detyrës zyrtare, marrje rryshfeti për regjistrimin e studentëve jashtë listave, shitje të notave dhe angazhimin e studentëve për të hy në provime për të tjerët. Për këtë shkak ai qëndroi diç më pak se gjashtë muaj në paraburgim, ndërsa kontrata për angazhim që kishte me UP-në iu ndërpre nga rektori i atëhershëm, Ibrahim Gashi.

Tani, derisa Arian Janova mbrohet në liri, në pritje të gjykimit, Komisioni i Fakultetit Filozofik e propozon për angazhim të sërishëm në thirrje të asistentit, duke ia lënë vendimin përfundimtar Senatit të Universitetit. Mbetet e paqartë pse Komisioni rekomandon që vendimin përfundimtar ta merr Senati, kur dihet mirë se Senati merr vendim përfudnimtar për të gjitha anagazhimet.

“Në përbërje të komisionit që e ka bërë këtë rekomandim të çuditshëm janë: prodekani Dashamir Bërxulli, si dhe profesorët Afrim Hoti, Ukë Xhemaj, Hasnije Ilazi, Shemsi Krasniqi, Aliriza Arënliu, Selim Bezeraj dhe Lulzim Dragidella”, thotë burimi i Telegrafit.

Burimet e informuara mirë në Fakultetin Filozofik tregojnë se Arian Janova është i afërt me dekanin e këtij Fakulteti, Bujar Dugolli, i cili më herët ka qenë udhëheqës studentor dhe ministër në dy mandate qeveritare. Mbetet të shihet nëse Senati i Universitetit të Prishtinës do ta mbështes rekomandimin e Komisionit të Fakultetit Filozofik dhe të kthejë në procesin mësimor njeriun i cili ndiqet për vepra penale.

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/fakulteti-filozofik-propozon-per-bashkepunetor-personin-e-akuzuar-per-shitje-notash/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala