Dënohet me 2 vjet burg kosovari që trafikoi refugjatë

Autori:Avdyl Pajaziti

Se fluksi i pashembullt i refugjatëve i refugjatëve që po vijnë në Gjermani ka ndikim edhe në shumë procese tjera, madje edhe në gjyqësi, tregon shembulli në vijim. Një gjykatë e Munihut i ka shqiptuar një “dënim shembullor”, gjegjësisht dy vjet burg efektiv një kosovari 44 vjeçar për trafikim refugjatësh në baza të rregullta.

Gjykata, në vendimin e saj ka konstatuar se trafikantët si në rastin e kosovarit kanë kontribuuar në mënyrë plotësuese në ashpërsimin e problemit të refugjatëve, shkruan süddeutsche.de. Në këtë mënyrë dënimi pretendohet të ketë edhe rolin e tij preventiv, ka thënë gjyqtari që ka shpallur vendimin.

Kosovari i dënuar ka ardhur në Gjermani në vitin 1993. Ai është akuzuar veç tjerash për trafikimin e pesë refugjatëve kosovarë përmes Hungarisë dhe Austrisë në Gjermani në shkurt të vitit 2015, transmeton albinfo.ch. Tashmë i dëuari, i ka ndihmuar ata për të nxjerrë biletat e trenit dhe ka udhëtuar bashkë me ta në tren duke i udhëhequr dhe drejtuar në rrugë.

Pak pas kësaj, në muajin mars, kosovari 44 vjeçar ka provuar që me makinën e tij VW Sharan të trafikojë nga Budapesti përmes Austrisë në Hungari gjashtë refugjatë, katër prej të cilëve nga Siria dhe dy me shtetësi të panjohur. Ai ishte marrë vesh me ta që pas mbërritjes në Stacionin Hekurudhor të Munihut t`ia paguajnë 2000 euro. Por grupi i përmendur është kapur me rastin e një kontrolli policor në autostradë me ç`rast kosovari është arrestuar dhe prej asaj kohe ka qëndruar në burgun e hetimeve.
44 vjeçari ka jetuar në vende të ndryshme të Gjermanisë dhe ka pasur vende të kohëpaskohshme të punës. Gruaja e tij jeton në Cyrih ndërsa djali 17 vjeçar në Gjenevë.
Në lartësinë e dënimit të tij gjykata ka pasur parasysh edhe faktin se ai ka qenë deri tash disa herë i dënuar për vepra të ndryshme penale si lëndim trupor, shantazhim ose mashtrim, vepra penale kët që i ka kryer madje edhe në kohët kur ka qenë i dënuar me kusht.
Bazuar në të dhënat e nxjerra nga celulari i tij, gjykata mendon se ai është përgjegjës edhe për raste të tjera të trafikimit, por ato nuk mund t`i argumentohen.
Duke folur para trupit gjykues, kosovari ka thënë se ai dëshiron që edhe në të ardhmen të punojë si trafikant, shkruan gazeta gjermane.

Dënimi i shqiptuar sot nuk është ende i plotfuqishëm.

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/denohet-me-2-vjet-burg-kosovari-qe-trafikoi-refugjate/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala