Çështja e të pagjeturve asnjëherë nuk u hap në bisedimet e Brukselit

Autori:Avdyl Pajaziti

Kosova është e pafuqishme përballë Beogradit dhe bashkësisë ndërkombëtare për të kërkuar qytetarët e saj të pagjetur që nga lufta.

Me gjithë premtimet e Qeverisë së Kosovës se kjo çështje do të jetë temë e bisedimeve, asnjëherë të vetme kryeministrat Thaci – Daçiq, e as tash Mustafa – Vuçiq nuk e hapën këtë temë në Bruksel, raporton KTV.

Kryetari i Komisionit qeveritar për të pagjeturit, Prenk Gjetaj, thotë se kjo ka ndodhur për faktin se faktori ndërkombëtar nuk ka lejuar që çështja e normalizimit të rëndohet me të pagjeturit.

Të paktën ky është versioni që Gjetajt ia kanë dhënë kryeministrat e Kosovës.

Ndryshe, Komisioni është ankuar edhe te Komiteti Ndërkombëtar i Kryqit të Kuq se Serbia vazhdimisht ndërron lokacionet ku dyshohet për varreza masive, me faktin se gërmon në lokacione të gabuara.

Komisioni ka bërë të ditur se janë në përfundimin e një memorandumi për krijimin e një liste të përbashkët rajonale për të pagjeturit, por kanë hasur në vështirësi, pasi Beogradi nuk po lejon që Kosova të jetë e përfshirë si shtet.

Lista rajonale do të përfshijë Kroacinë, Kosovën, Bosnjë e Hercegovinën, Serbinë dhe Malin e Zi, transmeton Koha.net.

Me këtë të fundit Kosova do të lidhë edhe një marrëveshje të tillë, e cila ka synim intensifikimin dhe zbardhjen e fatit të secilit person që mungon, si pasojë e luftërave në Ballkan.

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/ceshtja-e-te-pagjeturve-asnjehere-nuk-u-hap-ne-bisedimet-e-brukselit/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala