Eko 6 vite më parë

Çeku i thotë Qeverisë: Ruajë 24 milionë eurot e veteranëve

Autori:Avdyl Pajaziti

Derisa nuk e dinë se sa kohë do t’u marrë shqyrtimi i rreth 20 mijë ankesave që kanë pranuar për procesin e verifikimit të statusit të veteranëve, invalidëve, dëshmorëve, pjesëmarrësve dhe të internuarve të UÇK-së dhe se kur pritet të publikohen listat përfundimtare të këtyre kategorive, përfaqësues të Komisionit qeveritar, të ngarkuar për verifikim, kanë thënë se do të kërkojnë nga kryeministri dhe ministri i Financave që me rishikim të buxhetit të mos rialokohen 24 milionët e ndarë për realizimin e të drejtave të këtyre kategorive për vitin 2015.

Kryetari i Komisionit, Agim Çeku, ka thënë se për çështjen e buxhetit kanë kërkuar një takim me kryeministrin, Isa Mustafa.

“Ne të hënën e kësaj jave kemi kërkuar një takim me kryeministrin, unë si kryetar i Komisionit dhe shefi i Sekretarisë, jemi në pritje që të na pranojë kryeministri dhe që ky buxhet të mos ndryshohet me rishikimin e tij që bëhet në fund të këtij muaji”, ka thënë Çeku.

Për realizimin e të drejtave që përcaktohen me Ligjin mbi veteranët, Çeku ka thënë se nevojitet edhe nxjerrja e një Udhëzimi administrativ. “Do të flasim për buxhetin dhe çështjen e një udhëzimi administrativ që Qeveria duhet ta nxjerrë. Nëpërmes tij Qeveria duhet t’i përcaktojë rregullat, kriteret e mënyrën e aplikimit, dokumentacionin e nevojshëm e të tjera. Nuk do të thotë që varet nga Komisioni, edhe po të kryhet sot puna nga ne pa e pasur një Udhëzim nga Qeveria nuk mund të fillojë realizimi i këtyre të drejtave”, ka thënë ai

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/ceku-i-thote-qeverise-ruaje-24-milione-eurot-e-veteraneve/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala