Borxhlinjtë e mbajtur fshehtë

Autori:Avdyl Pajaziti

Institucionet shtetërore dhe Ndërmarrjet Publike ende nuk kanë publikuar listat e borxhlinjve publikë, duke shpërfillur kështu afatin e përcaktuar me Ligjin për faljen e borxheve publike.

E mërkura e 30 shtatorit ishte afati i fundit për hartimin dhe publikimin e listave të borxhlinjve publikë, ndërkohë që edhe pas kaq ditësh ato vazhdojnë të mos publikohen.

Por, sipas Ministrisë së Financave, nga dita e hyrjes në fuqi të ligjit të gjitha Institucionet Shtetërore dhe Ndërmarrjet Publike, kanë mundur të fillojnë me implementimin e Ligjit.

“Kjo varet se sa institucionet janë të përgatitura për të filluar me procedurat për faljen e borxheve. Për këtë vlen të përmendet se Departamenti i Tatimit në Pronë ka mbajtur trajnime me të gjithë zyrtarët përgjegjës të komunave për procedurat për implementimin e Ligjit për faljen e borxheve me theks të veçantë Tatimin në pronë,” është shprehur Muharrem Shahini nga kjo Ministri.

Nga një kërkim online rreth publikimit të listave të borxhlinjve publik në shtatë kryeqendrat e Kosovës, asnjëra prej këtyre komunave nuk i ka publikuar dhe interesimi për t’i parë borxhlinjtë e tatimit në pronë apo të ndërmarrjeve publike do të jetë i vazhdueshëm.

Për këto dy kategori shuma totale e faljes për periudhën deri me 31 dhjetor 2008, shkon në 522 milionë euro.

Vazhdon të mos publikohet as Udhëzimi administrativ për procedurat e faljes së borxheve publike, të miratuar në mbledhjen e 16 shtatorit të Qeverisë së Kosovës. Sipas deklarimeve në ekzekutiv, ky udhëzim publikohet tek pasi të marrë nënshkrimin e kryeministrit, Isa Mustafa.

Dispozitat e këtij udhëzimi administrativ specifikojnë obligimet e institucioneve përkatëse në zbatimin e ligjit për faljen e borxheve, lidhur me hartimin e listave të borxhlinjve dhe publikimin e tyre.

Në borxhet që do të falën janë edhe rreth 148 milionë borxh ndaj ATK-së, rreth gjashtë milionë borxh ndaj Doganës së Kosovës, deri sa shuma totale e faljes shkon në 680 milionë euro. /Gazeta Tribuna/

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/borxhlinjte-e-mbajtur-fshehte/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala