Lajme 6 vite më parë

BE rekomandon zyrtarisht hapjen e kapitullit 35 me Serbinë

Autori:Avdyl Pajaziti

Komisioni Evropian dhe Shërbimi evropian i Punëve të Jashtme (EEAS) i kanë dorëzuar Këshillit të Ministrave dhe shteteve anëtare të BE-së rekomandimin për hapjen e kapitullit 35 në negociatat me Serbinë.

Këtë e pohoi Maja Kocijançiç, zëdhënësja e Përfaqësueses së lartë për Politikë të Jashtme e të Sigurisë, Federica Mogherini.

Kapitulli 35 ka të bëjë me çështjen e Kosovës.

E pyetur se si i komenton deklaratat e zyrtarëve serbë se me kapitullin 35 nga Serbia kërkohet të njeh pavarësinë e Kosovës, Kocijançiç është shprehur se janë shtetet anëtare të BE-së ato që vlerësojnë performancën e Serbisë dhe të vendosin për hapjen e kapitujve.

“Në përputhje me kornizën për negociatat për anëtarësimin e Serbisë në Bashkimin Evropian, Komisioni Evropian dhe Shërbimi evropian i Punëve të Jashtme (EEAS) kanë përgatitur dhe i kanë dorëzuar Këshillit të Ministrave vlerësimin e progresit të shënuar në dialog me Kosovën dhe i kanë sugjeruar shteteve anëtare hapjen e kapitullit 35”, ka thënë Kocijançiç për të përditshmen serbe “Danas”.

Sipas fjalëve të saj, vlerësimi ka të bëjë me shqyrtimin e marrëveshjeve të arritura në dialog dhe me çështjet e hapura në kuptim të zbatimit të tyre.

“Tani i mbetet shteteve anëtare të marrin në konsideratë performancën e Serbisë dhe të vendosin për hapjen e kapitujve të rinj”, ka thënë zëdhënësja e Federica Mogherinit. /Telegrafi/

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/be-rekomandon-zyrtarisht-hapjen-e-kapitullit-35-me-serbine/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala