Bankat me fitime marramendëse

Autori:Avdyl Pajaziti

Bankat në Kosovë vazhdojnë të janë bizneset më të qëndrueshme dhe më profitabile në rajon. Ato vazhdojnë të raportojnë fitime të larta edhe gjatë nëntë muajve të parë të vitit 2015, krahasuar me vitet paraprake.

Nga të dhënat e publikuara, sipas Bankës Qendrore të Kosovës (BQK), shihet se gjatë nëntë muajve të parë të këtij viti bankat komerciale arritën fitim neto në vlerën prej 69.3 milionë eurove. Vetëm gjatë muajit shtator bankat shënuan fitim neto në vlerë prej 9.6 milionë eurosh.

Banka Qendrore e Kosovës tregon në raport se si të hyra kryesore bankat i kanë të hyrat nga interesi (140.8 milionë euro), shpenzimet e interesit deri në këtë tremujor janë 17.6 milionë euro, ndërsa shpenzimet e përgjithshme dhe ato administrative janë 76.3 milionë euro.

Asetet e bankave deri në fund të muajit shtator arrijnë në vlerën prej 3.32 miliardë euro, vlera e kredive është 1.99 miliardë euro, me rritje vjetore të kredive prej 7.5% (9% kreditë e ekonomisë familjare dhe 7.2 % kreditë për ndërmarrje).

Vlera e depozitave të qytetarëve është 2.66 miliardë euro duke shënuar rritje vjetore prej 5.5%. Norma efektive e interesit që bankat u paguajnë qytetarëve për depozita llogaritet të jetë 0.9%. Kapitali vetanak i bankave komerciale në Kosovë arrin vlerën e 358.2 milionë eurove.

Aktualisht në Kosovë operojnë 10 banka komerciale nga të cilat 8 kanë pronësi të huaj, ndërsa 2 vendore. Ato i kanë gjithsej 265 degë në të gjithë vendin. Të punësuar në këto banka janë 3,409 punëtorë. /Kallxo.com/Gazeta Fjala/.

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/bankat-me-fitime-marramendese/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala