Vendim i ri për import të veturave, nga sot nuk ka kufizim vitesh

Autori:Avdyl Pajaziti

Një Opel Kadet i prodhuar në vitin 1981 i sjellur nga Gjermania, Mentor Gashit i qëndroi i pa regjistruar tash e disa vjet.

Por, me një vendim që erdhi nga qeveria e Isa Mustafës,  vetura e tij e vjetër do të pajiset me tabela RKS e do të qarkullojë lirshëm rrugëve të vendit.

Ndryshimet që erdhën nga Ministria e Financave bëjnë që në Kosovë tani e tutje të regjistrohen vetura edhe më të vjetra se 13 vjet.

Në fakt, vendimi i ri lejon të importohen të gjitha veturat pavarësisht vjetërsisë, veçse në bazë të viteve është caktuar edhe norma e taksës.

Gazeta Fjala ka siguruar vendimin e Qeverisë së Kosovës që lejon importin e veturave, por edhe taksat që duhet paguar për to në bazë të secilit vit.

Vendimin e miratuar në Qeveri, Dogana e Kosovës do ta fillojë së implementuari nga dita e premte.

“Vendimi i ri ka të bëjë me vjetërsinë dhe shkallëzimin e taksës e cila fillon prej 8 vite, vjetërsi për të cilën importuesi duhet të paguajë 400 euro e deri në 17 vite, ku duhet paguar 1,500 euro. Kjo akcizë është për veturat me kapacitet prej 2000 kubik”, ka deklaruar Adriatik Stavileci, zëdhënës në doganat e Kosovës.

Gazeta Fjala ka siguruar edhe specifikat tjera të importit të veturave në bazë të vjetërsisë e kapacitetit të tyre.

Rrjedhimisht, vendimi i qeverisë do të ketë ndikim pozitiv vetëm tek veturat që vjetërsinë e kanë deri në tetë vjet. Kjo, për faktin se importuesit e tyre për import të veturave deri në tetë vjet kanë paguar 500 euro e me vendimin e ri do të paguajnë 400, ndërsa për krejt vitet tjera norma e akcizës është rritur.

Dogana e Kosovës bën me dije se brenda vitit në Kosovë importohen rreth 20 mijë vetura me vlerë monetare prej rreth 80 milionë euro. Ndërsa, taksat që paguhen për sjelljen e tyre në vend kapin vlerën e rreth 40 milionë eurove.

Nga viti 1999 deri në vitin 2004 importi i veturave nuk ka qenë i kufizuar në bazë të vjetërsisë. Në vitin 2004 është marr vendim që mos të importohen veturat më të vjetra se tetë vite. E në vitin 2011 u vendos që vjetërsia e tyre të lejohet të jetë deri 13 vjet. Ndërsa, vendimi i fundit bën që vjetërsia e tyre ta mos shikohet fare.

Pavarësisht kësaj, ky fakt ka gëzuar Mentor Gashin, i cili qysh javën e ardhshme planifikon të regjistrojë veturën e tij Opel Kadet, të prodhuar në vitin 1981.

“Unë jam në gjendje të paguaj sado që të jetë caktuar, vetëm të më mundësohet regjistrimi i veturës sepse është prodhim i veçantë dhe e kam dhuratë nga një person i veçantë”, ka deklaruar Gashi.

Por, vendimin nuk e priten fort mirë tregtarët e veturave.

“Ne ende nuk jemi në dijeni se çka përmban vendimi. Por, çdo shtrenjtim i taksave të importit do të bënte që të rritet çmimi i tyre. Edhe ashtu, ne nuk po kemi ndonjë leverdi shkaku i gjendjes së rëndë sociale e ekonomike.”, ka deklaruar Feim Huruglica, tregtar veturash.

 

Për vetura deri në 2000 cmm norma e tatimit të akcizës do të jetë:

Deri në 8 vite të armotizimit                           400 euro

Deri në 9 vite të armotizimit                           600

Deri në 10 vite të armotizimit                         700

Deri në 11 vite të armotizimit                         800

Deri në 12 vite të armotizimit                         900

Deri në 13 vite të armotizimit                         1000

Deri në 14 vite të armotizimit                         1100

Deri në 15 vite të armotizimit                         1200

Deri në 16 vite të armotizimit                         1300

Deri në 17 vite e më shumë të armotizimit     1500

 

Për vetura prej 2001 deri në 3000 cmm norma e tatimit të akcizës do të jetë;

Për vetura të reja të pa regjistruara                  300 euro

Deri në 8 vite të armotizimit                           400

Deri në 9 vite të armotizimit                           600

Deri në 10 vite të armotizimit                         800

Deri në 11 vite të armotizimit                         1000

Deri në 12 vite të armotizimit                         1200

Deri në 13 vite të armotizimit                         1400

Deri në 14 vite të armotizimit                         1600

Deri në 15 vite të armotizimit                         1800

Deri në 16 vite të armotizimit                         2000

Deri në 17 vite e më shumë të armotizimit     2200

 

Për vetura mbi 3000 cmm norma e tatimit të akcizës do të jetë;

Për veturat e reja të paregjistruara                   800 euro

Deri në 8 vite të armotizimit                           1000

Deri në 9 vite të armotizimit                           1500

Deri në 10 vite të armotizimit                         1800

Deri në 11 vite të armotizimit                         2100

Deri në 12 vite të armotizimit                         2400

Deri në 13 vite të armotizimit                         2700

Deri në 14 vite të armotizimit                         3000

Deri në 15 vite të armotizimit                         3300

Deri në 16 vite të armotizimit                         3600

Deri në 17 vite e më shumë të armotizimit     3900

 

Ne Kosovë janë 1,116 lloje të veturave të regjistruara, prej të cilave 10 markat më të preferuara të kosovarëve janë: VW, Opel, Mercedes-Benz, Audi, Ford, Renault, Peugeot, Fiat, BMW dhe Daimler Benz.

Kosova është vendi më i populluar me vetura të markës Volkswagen. Nëpër rrugët tona çdo ditë qarkullojnë fiks 130,220 vetura të prodhuesit më të madh evropian.

Kjo është shifra zyrtare e veturave të regjistruara vitin e fundit sipas Ministrisë së Punëve të Brendshme, të dhëna të cilat i posedon Gazeta Fjala. Sipas MPB-së në Kosovë në fund të viti 2014 kanë qenë të regjistruara 290 mijë vetura. Pra, 45 për qind e tyre janë VW.

Por, nuk mbesin prapa as veturat tjera gjermane. Në vend të dytë janë veturat e markës Opel. Kosovarët ngasin 52,337 vetura Opel. Edhe vendi i tretë dhe ai i katërt janë të rezervuar për veturat gjermane, Mercedes-in dhe Audi-në. Janë mbi 34 mijë vetura të markës superiore të regjistruara në vend, përderisa Audi të regjistruara janë gjithsejtë 21 mijë. Së bashku me BMW-në del se në Kosovë janë 250 mijë vetura gjermane, apo mbi 85 për qind e të gjitha mjeteve motorike që lëvizin tek ne.

Vetura e vetme jogjermane që hyn në top 5 është Fordi, me mbi 16 mijë vetura. Por, dominimi i veturave gjermane nuk e bën Kosovën vend ku ka pak lloje të markave në rrugë.

Në shtetin tonë janë prezent afro 1000 lloje veturash. Specifikë tjetër, është se mbi 750 lloje janë te prezantuara vetëm me nga një veturë. Pra, të gjithë vozisin veturë që nuk e ka askush tjetër, duke i bërë ata unikë. Janë marka që nuk keni dëgjuar asnjëherë për to, megjithatë qarkullojnë në rrugët tona. Se çfarë emrash kanë mund t’i shihni edhe në foton e mëposhtme të veturave që fillojnë me germën A.

Modelet luksoze italiane po bëjnë garë me njëra tjetrën se cila të dominojnë në tregun tonë. Deri tash ka balotazh, sepse janë 7 kosovarë që kanë nga një Ferrari në garazhet e tyre e poaq nga një Lamborghini. Por, asnjë Bugatti, që llogaritet të jetë vetura më e shtrenjtë në botë nuk ka tabela RKS.

 

Automjetet e regjistruara në Kosovë në bazë të vitit të prodhimit

Automjetet Viti_i_Prodhimit
1 1942
1 1955
2 1957
3 1958
4 1960
1 1961
3 1962
3 1963
6 1964
7 1965
6 1966
8 1967
12 1968
22 1969
25 1970
34 1971
45 1972
49 1973
54 1974
64 1975
64 1976
100 1977
174 1978
304 1979
463 1980
614 1981
820 1982
1514 1983
3854 1984
6617 1985
10451 1986
13342 1987
14641 1988
15049 1989
14476 1990
14576 1991
13194 1992
8437 1993
6523 1994
5168 1995
5125 1996
6438 1997
10616 1998
15490 1999
15984 2000
16453 2001
17039 2002
14585 2003
11652 2004
8461 2005
5606 2006
4442 2007
3884 2008
2303 2009
1843 2010
1717 2011
1420 2012
866 2013
Gjithsej 274655

 

 

 

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/analiza/vendim-i-ri-per-import-te-veturave-nga-sot-nuk-ka-kufizim-vitesh/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala