Sekretari ilegal më i fortë se tre ministra (Dokumente)

Autori:Avdyl Pajaziti

Përgjegjësi kryesor për mungesën e 100 milionë eurove në Ministrinë e Mjedisit dhe Planifikimit Hapësinor (MMPH) është Arben Çitaku, i cili është zgjedhur në pozitën e Sekretarit Permanent në mënyrë ilegale.

Kjo, pasi kur u zgjodh nuk kishte as diplomë fakulteti. Në dokumentet që i posedon Gazeta Fjala, Këshilli i Pavarur Mbikëqyrës për Shërbimin Civil të Kosovës kishte lëshuar vendim të formës së prerë që konkursi të rishpallej. E ky është organi më i lartë vendimmarrës për këto raste.

Por, Çitakut nuk iu lëkund pozita. Urdhërin e Këshillit të marrë me 3.10.2011 nuk e përfilli Ministria e Administratës Publike e udhëhequr nga Mahir Jagcilar. Ndërlidhja është e fuqishme, pasi pikërisht Jagcilar ishte Ministër i Mjedisit, kur Çitaku ishte zgjedhur ilegalisht. Nuk reagoi fare as Dardan Gashi, ministër kur u mor vendimi. E, nuk e ka ndërmend të reagojë as Ferid Agani. Çitaku vazhdon të jetë mbi ta, pavarësisht faktit se të tre ministrat vijnë nga tri parti të ndryshme.

“Përmbushja e kritereve për ushtrimin e detyrës së sekretarëve të përgjithshëm si dhe aspekteve të tjera relevante të funksionimit të tyre janë nën kompetencën e Këshillit për pozita të nivelit të lartë drejtues. Sipas informatave zyrtare sekretari i përgjithshëm i MMPH është duke e ushtruar këtë detyrë qe shtatë vjet”, tha për Gazetën Fjala, Ferid Agani, Ministër i Mjedisit.

Pos tre ministrave, nuk reaguan as krerët e shtetit. Çitaku doli më i fortë edhe se ata.

“Nëse personi përgjegjës nuk ekzekuton vendimin brenda 15 ditësh, Këshilli i Pavarur Mbikëqyrës për Shërbimin Civil të Kosovës do të njoftojë me shkrim kryeministrin dhe Kuvendin e Kosovës”, thuhet në vendimin që e posedon Gazeta Fjala. Nuk reagoi as kryeministri, as kuvendi.

Ky mosreagim i kushtoi vendin 100 milionë euro dhe me degradim të plotë të ujërave dhe mjedis në vend. Këtë e ka konstatuar gjatë dy ditëve të kaluara vet eksperti i mjedisit, Besim Dobruna që punon në këtë ministri. Ai, kalkulimet i kishte bërë duke u bazuar në ligjet dhe udhëzimet administrative të Kosovës./Gazeta Fjala/

01 001 (1) 02 001 (2) 03 001 (3) 04 001 (4) 05 001 (5) 6

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/analiza/sekretari-ilegal-me-i-forte-se-tre-ministra-dokumente/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala