Isa si Thaçi 2

Autori:Gazeta Fjala

Para pak ditësh është prezantuar projektbuxheti për vitin 2016, i cili në krahasim me atë të vitit të kaluar është rritur për 100 milionë euro. Sipas këtij projeksioni shpenzimet buxhetore do të jenë 1 miliard e 680 milionë euro, ose dy për qind më shumë se në vitin 2015. Ndërkaq të hyrat prej 1 miliard e 597 milionë eurove janë 4 për qind më të larta.

Mirëpo, në esencë ky nuk është buxhet zhvillimor- nuk ka investime dhe nuk premton se do të bëhet diçka më shumë për përmirësimin e ambientit për biznes. Kjo duket kur kemi parasysh se 22 për qind e shpenzimeve është orientuar për çështje ekonomike- zhvillimore.

Rritja më e madhe ndodhë në sektorët social, përkatësisht të pagat dhe mëditjet, si edhe te transferet dhe subvencionet, që do të thotë në segmentin e pensioneve dhe mbrojtjes sociale.

Pjesëmarrja e këtyre kategorive në shpenzimet e përgjithshme  do të jetë 59.3 për qind, ndërsa sivjet është 57.2 për qind. Ndërkaq pjesëmarrja e shpenzimeve kapitale ka mbetur e njëjtë – 27 për qind.

Pra, i tërë ky strukturim i buxhetit po del të jetë me të meta të mëdha dhe nuk përfshinë premtimet e mëdha që ka dhënë Qeveria e Kosovës. Sipas ekonomistëve ky buxhet është deficitar, ndërsa vazhdon me investime në infrastrukturë rrugore, prandaj nuk do të krijojë vende të reja të punës.

Haki Shatri nga partia opozitare Aleanca e Kosovës, thotë se buxheti nuk garanton perspektivë zhvillimore, meqenëse 90 për qind e këtij buxheti do të shkojë në vazhdimin e investimeve paraprake.

“Buxheti i propozuar nga Qeveria është buxhet deficitar. Të hyrat do të jenë më të vogla se sa shpenzimet për 82.2 milionë euro. Kjo diferencë do të mbulohet nga borxhi i brendshëm. Pra, nuk garantohet stabilitet buxhetor, e as perspektivë zhvillimi”, tha Shatri.

Sipas tij,  zvogëlimi i kategorisw sw investimeve kapitale nuk shkon në mbështetje të ndonjë zhvillimi dinamik.

“Kryesisht do të investohet në infrastrukturën rrugore, madje 90 për qind e tyre do të shkojnë në vazhdimin e projekteve nga vitet paraprake”, u shpreh Shatri për Gazetën Fjala.

Ai gjithashtu thotë se ky buxhet nuk është i mjaftueshëm për zgjidhjen e problemeve me të cilat përballet ekonomia dhe se varfëria e papunësia do të mbeten në shkallën e njejtë siç kanë qenë.

“Rritja e projektuar ekonomike – nëse realizohet -,nuk është e mjaftueshme për zgjidhjen e problemeve aktuale që e ngarkojnë ekonominë dhe popullsinë e Kosovës. Nuk do të zvogëlohet as shkalla e papunësisë e as niveli i varfërisë”, tha ai.

Ndërkaq, Berat Thaqi nga Instituti për Studime të Avancuara- GAP, thotë se prej treguesve se pse buxheti i vitit 2016 nuk është zhvillimor është investimi i 60 për qind të tij në infrastrukturë rrugore, por edhe ndarja që bëhet në mes ministrive.

“Nuk mund të konsiderohet buxhet zhvillimor kur 60 për qind e buxhetit, apo  pjesa më e madhe e tij shkon në paga dhe mëditje dhe subvencione e transfere, ndërkohe që investimet kapitale përbëjnë vetëm pak më shumë se 27 për qind % të shpenzimeve dhe krahasuar me sivjet janë rritur vetëm 1 për qind

Si indikatorë tjetër për mungesën e përcaktimit zhvillimor, Thaci e sheh edhe te ndarja sipas ministrive, pasi sipas tij Ministria e Punës dhe Mirëqenies Sociale e merr buxhetin kryesore  -rreth 29 për qind.

Ai po ashtu thotë se rritja e lehtë e shënuar në disa ministri nuk është premtuese, ndërkaq mbetet të shihet se çfarë ndikimi do të ketë rritja e shumës së mjeteve të ndara për disa agjenci të pavarura.

“Nuk mund të mohohet se ka një rritje të lehtë të buxhetit tek Ministria e Infrastrukturës, Zhvillimit Ekonomik dhe ajo e Bujqësisë, Pylltarisë dhe Zhvillimit Rural, mirëpo kjo nuk është diçka që premton zhvillim të hovshëm ekonomik.  Gjithashtu, rritja e lehtë e buxheti për disa agjencinë të pavarura (Komisioni Kosovar i Konkurrencës,  Zyra e Rregullatorit për Energji etj) të cilat janë kyçe për funksionimin e tregut, duket pozitive, mirëpo sa mjafton për realizimin e objektivave të tyre mbetet të shihet”, shprehet ai.

Sipas tij rënia e buxhetit për Ministrinë e Arsimit Shkencës dhe Teknologjisë dhe UP-në nuk duket të jetë diçka e mirë.

“Me gjithë rritjen e grantit të arsimit për komuna, rënia e buxhetit për MASHT-in dhe Universitetin e Prishtinës nuk duket të jetë e mirë.

Ndonëse qeveria aktuale për ndarjet buxhetore për vitin 2015 arsyetohej se këtë dokument e ka trashëguar nga qeveria e kaluar, ajo Thaçi 2, mirëpo, as tash nuk po ofron diçka tjetër. Ndarjet mbeten të njëjta, si edhe projektet kapitale. Jo tregon se edhe Qeveria e Isës mbetet me koncept të njëjtë si Thaçi 2.  /GazetaFjala/

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/analiza/isa-si-thaci-2/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala