Institucionet për tre muaj shpenzuan gjysmë milioni euro për teknologji

Autori:Gazeta Fjala

 

Mijëra euro janë shpenzuar nga institucionet publike në Kosovë për blerjen e teknologjisë, vetëm gjatë tre muajve të parë të këtij viti.

Shpenzimet më të mëdha kanë shkuar për  për telefonë, iPad, TV, llaptop, kompjuterë, makina fotokopjuese dhe programeve softuerike, shkruan Gazeta Fjala.

Komuna e Fushë Kosovës ka shpenzuar më së shumti këtë fillim vit,  rreth 20 mijë euro për pajisje të teknologjisë informative, të cilin tender e ka ndarë në dy llote.

Për të parin ajo ka paguar 17 mijë e 125 euro derisa për llotin e dytë për furnizim me pjesë të tjera të imëta të teknologjisë informative  2 mijë e 497 euro, shkruan Gazeta Fjala.

Bazuar në të dhënat e publikuara në uebfaqen e Komisionit Rregullativ të Prokurimit Publik (KRPP), të kontrolluara nga Gazeta Fjala vetëm nga janari i këtij viti deri me 18 prill janë zhvilluar 9 aktivitete tenderuese për furnizim me teknologji.

Vlera e përgjithshme e të gjitha tenderëve publikë për këtë periudhë është 52 mijë 690 euro.

Menjëherë pas Fushë Kosovës, në listën me shpenzimet më të mëdha radhitet Zyra e Auditorit të Përgjithshëm. Ky institucion për furnizim me “160 IP telefona dhe instalimi i sistemit të centralës voip”, ka paguar plot 12 mijë e 981 euro.

Më pak se 10 mijë euro për teknologjinë e informacionit harxhuan Agjencia Kadastrale e Kosovës, Paneli Zgjedhor për Ankesa dhe Parashtresa, Komuna e Prishtinës, Agjencia Pyjore e Kosovës, Agjencia e Ushqimit dhe Veterinarisë etj.

Agjencia Kadastrale e Kosovës ka shpenzuar  6 mijë e 200 euro për blerja e pajisjeve të TI për këtë institucion aq sa ka shpenzuar edhe Paneli Zgjedhor për Ankesa dhe Parashtresa (PZAP).

Veç se ky i fundit ka cekur se kjo shumë është ndarë për furnizim me telefona mobil.

Komuna e Prishtinës është furnizuar me paisje teknologjike për qendrën e biznesit me TV smart, projektor  dhe elemente tjera përcjellëse, për tërë këtë ajo ka shpenzuar 3 mijë e 722 euro.

Agjencia Pyjore e Kosovës për mirëmbajtja dhe servisim të teknologjisë informative harxhoi 2 mijë euro.

Edhe Stacioni i Autobusëve në Gjilan investoi rreth tre mijë euro për Furnizim me Teknologji Informative dhe mirëmbajtja e saj. Këto para u ndanë për blerjen e Laptop, Printer, Toner, Tastatur, maus etj.

Agjencia e Ushqimit dhe Veterinarisë  për blerjen e tre Print/Coppy/ Scan për nevojat e zyrës se arkivit harxhoi 915 euro.

Agjencia Kundër Korrupsionit këtë fillim vit është paisur edhe me një iPad Air në vlerën 460 euro. Ndërkohë që në dhjetor të 2015-ës kreu i këtij institucioni kishte shpërblyer punëtorët më të suksesshëm me nga një telefon.

Vlera e krejt kësaj blerje ishte fiks 1 mijë e 950 euro.

RadioTelevizioni i Kosovës për blerjen e një telefoni Mobil, ka paguar 790 euro. Sipas përshkrimit të kontratës ky telefon mobil nevojitet për trajnim të gazetarëve lidhur me xhirimin, montazhën dhe transmetimin live nga tereni përmes telefonisë mobile.

Blerja e teknologjisë pa u analizuar nevojat

Kritika vazhdimisht janë adresuar në drejtim të institucioneve të cilat shpenzonin shumë në pajisjet teknologjike.

Edhe Auditori Gjeneral në vitin 2011 pati nxjerr një raport special i cili konstatonte se dhjetëra milionë euro janë shpenzuar nga institucionet publike për tu pajisur me produkte të teknologjisë informative të cilat janë blerë pa u analizuar mirë nevojat për furnizim.

ZAP-i konstatonte parregullsitë që kishin ndodhur në tri vitet e fundit gjatë blerjeve së këtyre produkteve, që sipas tyre institucionet kanë mangësi në planifikim, analizim të nevojave si dhe në tenderim të pajisjeve të IT-së.

Sipas ZAP një shumë prej mbi 29 milionë eurove është keqmenaxhuar nga institucionet në Kosovë për blerje të pajisjeve të teknologjisë informative.  /Gazeta Fjala/

 

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/analiza/institucionet-per-tre-muaj-shpenzuan-gjysme-milioni-euro-per-teknologji/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala