Falja e borxheve në duart e deputetëve  

Autori:Avdyl Pajaziti

Qytetarëve dhe bizneseve të Kosovës nuk do tu falen borxhet tani. Ata do të presin edhe për një kohë që vendimi i Qeverisë së Kosovës për faljen e 680 milionë eurove të hy në fuqi. Madje, kjo nuk mund të ndodh edhe pa e thënë fjalën e fundit Kuvendi i Kosovës. Në  këtë institucion me vota të deputetet duhet të miratohet ligji për faljen e borxheve. E siç merr vesh Gazeta Fjala miratimi i tij nuk pritet të ndodh shpejt.

Bile sipas burimeve projekt ligji për falje të borxheve do të shkojë në Kuvend tek pas pushimeve verore. Por, edhe shkuarja e tij për miratim pritet që të sjell përplasje mes pozitës dhe opozitës.

E kreu i Qeverisë së Kosovës, Isa Mustafa ka bërë thirrje që ky projekt ligj të miratohet, pasi sipas tij ka të bëjë me mirëqenien e qytetarëve.

“…është shumë më rendësi miratimi i këtij projektligji, i cili ka të bëjë më mirëqenien e qytetarëve por edhe disiplinimit të qytetarëve për përmbushjen e obligimeve ndaj kompanive publike”, ka thënë Mustafa.

Kurse, njohësit e ekonomisë thonë se Qeveria e Kosovës nuk po tregohet transparente me procesin e faljeve të borxheve. Ata po ashtu ata kanë thënë se kjo falje nuk do të ndodh edhe disa muaj.

“Qeveria e Kosovës dje e ka aprovuar Projektligjin për Faljen e Borxheve. Çka do te thotë se tani Kuvendi do te merr disa muaj kohë në shqyrtimin dhe aprovimin e tij, para se ligji te hyj ne fuqi. Po ashtu, ende nuk dihet shifra totale e borxheve qe do te falen. Dhe ky është problemi me i madh. Edhe pse kane kaluar 4 muaj nga dita kur është formuar Komisioni për te shqyrtuar mundësinë e faljes se borxheve, edhe me tutje nuk ka një shifër konkrete se sa është ku borxh dhe kujt do ti falet”, ka thënë për Gazetën Fjala, Agron Demi nga Instituti GAP.

Demi ka thënë se me Projektligj që është aprovuar të martën , thuhet se brenda 30 ditëve nga data e hyrjes se ligjit ne fuqi, institucionet shtetërore do te identifikojnë borxhlinjtë. Andaj, sipas tij nuk është ende e ditur se sa është ai borxh.

“Kompanitë publike dhe institucionet tjera shtetërore nuk i kane mbajtur si duhet llogarite se kush sa ka borxh dhe si është i ndare ai nder vite. Një pjesë e madhe e borxhit është parashkruar, ngase institucionet shtetërore nuk i kane dërguar rastet ne gjykata, ashtu siç parashihet me Ligjin për Marrëdhëniet e Detyrimeve”, ka thënë Demi.

Ai ka treguar se edhe GAP ka kërkuar nga kompanitë publike dhe komunat shifra te borxheve të qytetarëve ndaj tyre, por siç ka treguar Demi shumica e tyre kanë thënë se ende nuk i kanë këto të dhëna.

Kurse, drejtori i Institutit STRAS, Ibrahim Rexhepi thotë se Qeveria e Kosovës përmes faljeve të këtyre borxheve ka synime të tjera. Sipas tij, më këtë veprim qeveria do ti detyroj qytetarët që ti paguajnë obligimet që kanë nga viti 2009.

“…mirëpo, qeveria përmes faljes se tyre ka synime te tjera,  së pari qytetarët t’i detyroj të paguajnë obligimet që kanë nga vitit 2009, si edhe te hekë  qafesh borxhet, te cilat ne fakt janë te humbura, por është dashur t’i mbajë në evidencë”, ka thënë Rexhepi.

Ai po ashtu ka treguar se totali i borxheve që duhet të falen janë 680 milionë, por sipas tij duhet të kuptohet se janë para që nuk i ka arka e shtetit e as ofruesit e shërbimeve publike./Gazeta Fjala/.

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/analiza/falja-e-borxheve-ne-duart-e-deputeteve/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala