Burgjet e Kosovës mbesin pa mish

Autori:Avdyl Pajaziti

Një tender i Ministrisë për së Drejtësisë për furnizim me ushqim  si pemë, perime, miell, bukë dhe mish për Shërbimit Korrektues të Kosovës nuk po mund të përfundojë i kompletuar. Ani pse për të procedurat kanë filluar që nga muaji maj.

Burgjet e Kosovës do të mbesin pa mish dhe produkte të mishit pasi që pjesa e dytë e këtij tenderi është anuluar, për arsyeje se kompanisë fituese nuk iu verifikuan diplomat e kërkuara.

Në muajin korrik u shpallën fituesit e tenderit në vlerë prej 721 mijë e 623 eurosh.

Me pemë dhe perime burgjet do t`i furnizoj kompania  “Beni Dona Plast” nga Prishtina me çmimin prej  275 mijë e 788 euro.

Derisa për dy pjesët tjera të këtij tenderi furnizim me mish dhe produkte të mishit dhe furnizim me miell dhe material për gatimin e bukës i fitoi konsorciumi “Hajdini Comerc” &“Kualiteti” .

Pika kontestuese e këtij tenderi është furnizimi me mish, pjesë e tenderi me një çmim prej 394 mijë e 600.

Procedurat për nënshkrimin e kontratës u stopuan pas ankesës së kompanisë “Apetiti” nga Vushtrria, pjesëmarrëse në këtë tender të ministrisë së Drejtësisë.

“Apetiti”, pretendonte se autoriteti kontraktues kishte bërë shkelje të ligjit të prokurimit pasi që kompanisë fituese  “Hajdini Comerc” nuk i verifikoi diplomat e teknologut të ushqimit.

Ankesën e saj kompania “Apetiti” e deponoi në Organin Shqyrtues të Prokurimit me datë 20 gusht.

Pas shqyrtimit të ankesës, gjykata e tenderëve i dha të drejtë asaj pasi që u vërtetua se Shërbimi Korrektues i Kosovës nuk kishte verifikuar diplomat kontestuese. Kjo gjykatë doli me vendimin e saj me datën 17 shtator, raporton Gazeta Fjala.

“OSHP urdhëron Shërbimin korrektues të Kosovës të vërtetoj diplomën e teknologut të ushqimit për arsyeje se AK-ja nuk ka vepruar autenticitetin e diplomës së Teknologut të ushqimit”, shkruan në këtë vendim.

Në arsyetimin e këtij vendimi thuhet se eksperti shqyrtues pasi që e kanë shqyrtuar dosjen e tenderit ka vërtetuar se Shërbimi korrektues kishte kërkuar nga ofertuesit “diplomën e teknologut të ushqimit”.

Mirëpo, në vazhdim të tij thuhet se operatori fitues pra “Hajdini Comerc” në dosjen e dorëzuar kishte ofruar një kimist ushqimor të diplomuar në universitetin e Tiranës dhe një Teknolog Ushqimor të diplomuar në universitetin Bujqësor të Tiranës.

“Paneli shqyrtues…konstaton se është e nevojshme verifikimi i diplomave të Kimistit dhe teknologut të Ushqimit me arsyetimin se këto diploma nuk janë as të nostrifikuara e as të noterizuara, por vetëm kopje”, shkruan në këtë vendim.

Në seancën kryesore të mbajtur këtë muaj paneli shqyrtues kishte konstatuar se autoriteti kontraktues nuk i ka respektuar dispozitat ligjore të ligjit të prokurimit.

“Do të duhej të vërtetoj-verifikoj diplomën e teknologut”, thuhet në vendim.

OSHP fillimisht kishte kërkuar që ky tender të kthehej në rivlerësim gjatë muajit gusht, por edhe pas kësaj faze nuk është përmbyllur  plotësisht.

Nuk është hera e parë që kompania “Hajdini Comerc” me bazë në Drenas ka problem në marrjen e kontratës nga Shërbimi Korrektues i Kosovës edhe pasi shpallet fituese.

Edhe në vitin 2012 pasi kishte fituar tenderin për të furnizuar me mish, ishte anuluar tenderi për shkak të problemeve teknike me dokumentacion. /Gazeta Fjala/.

 

 

 

 

 

 

 

 

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/analiza/burgjet-e-kosoves-mbesin-pa-mish/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala