Brezovica që nuk u bë

Autori:Avdyl Pajaziti

Sikur shumë projekte në Kosovë, edhe ai për Brezovicën nuk po ecë siç ishte paraparë fillimisht.

Edhe pse kanë kaluar 25 muaj që nga shpallja e fituesit projekti nuk ka filluari të realizohet. Konsorciumi fracez “MDP Consulting-Compagnie des Alpes” nuk i siguroi mjetet e premtuara, por Qeveria e Kosovës i dha ende kohë ta bëjë këtë.

Ishte premtuar se në muajin dhjetor investitori, do ta dorëzoj master planin për qendrën e re, projektin për ndikimin mjedisor dhe projektin për ndikimin ekonomik që do të ketë në komunën e Shterpcës. E pasi të përfundonte kjo procedurë do të niste ndërtimi i projektit, që nga fillimi i vitit të ri.

Mirëpo përkundër që të dyja palët edhe qeveria e Kosovës edhe konsorciumi fitues kishin deklaruar se gjithçka ishte gati sipas planit, duket se punët kanë ngecur. http://gazetafjala.com/analiza/serbia-nuk-mund-ta-ndale-brezovicen/

Javën e kaluar Hykmete Bajrami ministër e Tregtisë dhe Industrisë doli me lajmin se ky projekt do të shtyhet edhe për gjashtë muaj të tjerë.

Kështu premtimi për mbi 400 milionë euro investime në kompleksin turistik Brezovica nuk do të nisë në fillim të vitit 2016.

Pasi që konsorciumi francez “MDP Consulting – Compagnie des Alpes” nuk ka arritur t’i siguroj paratë për të filluar punimet për ndërtimin e qendrës së re turistike. Krejt çfarë kanë ofruar deri më tani, janë 100 milion euro të cilat, janë larg zotimeve të bëra në ofertë.

Megjithatë, Qeveria e Kosovës i dha edhe gjashtë muaj afat investitorit që t’i gjej ato.

“Komisioni ndërministror ka marrë vendimin, që kontrata dhe data e fundit për sjelljen e dokumentacionit, që dëshmojnë mobilizimin e financave, të jetë 31 maji i vitit 2016. Jemi marrë vesh gjithashtu, që të mos ketë shtyrje të tjera”, tha Bajrami.

“Më 31 maj, nëse nuk i kemi të gjitha dëshmitë për mobilizimin e financave, Qeveria e Republikës së Kosovës do të ekzekutojë garancinë bankare, e cila është dyfishi i asaj që ka qenë. Garancia bankare për 6-mujorshin e ditëve të punës ka qenë 180 mijë, tashmë kemi 500 mijë euro”, tha ajo.

Gazeta Fjala ka provuar të marrë një koment edhe nga përfaqësues të konsorciumit fitues“MDP Consulting – Compagnie des Alpes”, mirëpo ata ende nuk janë përgjigje në pyetjet e gazetës.

Historiku i projektit të Brezovicës

Me 25 nëntor të vitit 2014 në tenderin “Propozimi për Zhvillimin, Financimin dhe Operimin e Qendrës Turistike në Brezovicë”, ishte shpallur fitues konsorciumi i kompanive “MDP Consulting – Compagnie des Alpes – PGI Management .

Ishte planifikuar që kontrata mes Qeverisë së Kosovës dhe konzorciumit fitues për menaxhimin e Brezovicës të nënshkruhej më 3 mars të këtij viti. Mirëpo ajo ishte shtyrë deri në mesin e muajit Prill.

Konsorciumi Fitues do të ketë nën shfrytëzim 3364 hektarëve tokë në Brezovicë, për periudhën 99 vjeçare. Parashikohet që një shumë prej 410 milionë euro të investohen në infrastrukturë gjatë kohëzgjatjes së projektit.

Në njoftimit për dhënie të kontratës, specifikohet investimi i konsorciumit në tri faza.

Në fazën e parë është paraparë që kompania fituese të investojë 164 milionë e 287 mijë euro.

Në fazën e dytë do të investohen edhe 152 milionë e 541 mijë euro, në fazën e tretë në bazë të kontratës është planifikuar që të investohen edhe 92 milionë e 681 mijë euro tjera.

http://gazetafjala.com/analiza/serbia-nuk-mund-ta-ndale-brezovicen/

http://gazetafjala.com/brezovica-ne-dore-te-francezeve/

Gjatë muajin shtator ka përfunduar edhe vlerësimi i pronës së paluajtshme.

Kështu që fatura që shteti do të paguajë për shpronësimin e tokave, ku do të ndërtohet resorti Brezovica, pritet të kalojë shifrën e 30 milionë eurove.

Në ministria e financave, në Zyrën për Vlerësimin e Pronës së Paluajtshme në Departamentin e Tatimit në Pronë, thonë se kanë përfunduar edhe llogaritjen e dëmeve që kanë të bëjnë me shpronësimin në bazë të kërkesave, të cilat vijnë nga organet e ndryshme shtetërore për shpronësim. / Gazeta Fjala/

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/analiza/brezovica-qe-nuk-u-be/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala