Biznesmeni Latif Kryeziu, lë punëtorët pa paga

Autori:Zekirja Shabani

Punëtorët e kompanisë ‘Al Petrol’, të udhëhequr nga Latif Kryeziu, kanë hyrë në muajin e tretë që nuk kanë marë paga.

Arsye për këtë del të jetë performanca jo e mirë e kompanisë gjatë vitit të kaluar dhe fillimin e këtij viti, siç u është thënë nga menaxhmenti.

“…po thonë që “Al Petrol”, është në krizë financiare”, i ka thënë një punonjës i kësaj kompanie Gazetës Fjala, duke rikujtuar se menaxhmenti i ‘AL Petrol’ është arsyetuar tek ta se kanë mungesë buxhetore.

Megjithatë, asnjë nuk po e merr guximin të kërkojnë pagat e tyre nga frika se do të largohen nga vendi i punës.

Gazeta Fjala ka kërkuar përgjigje nga zyrtarët e kompanisë “AL Petrol”, lidhur me pohimet e ngritura por nuk janë përgjigjur në interesimin e Gazetës lidhur me këtë çështje.

Për shkeljet e të drejtat e punëtorëve dhe mos zbatim të ligjit të punës nga kjo kompani është raportuar në vazhdimësi, madje janë evidentuar nga sindikata edhe raste kur udhëheqësit i kanë keqtrajtuar të të punësuarit.

Azemi: Prapa kësaj kompanie qëndrojnë njerëz të politikës

Të njoftuar me rastin e shkeljes së të drejtave të punëtorëve të Al Petrolit janë edhe në Sindikatën e Sektorit Privat të Kosovës.

Jusuf Azemi kryetar i kësaj sindikate tha për Gazetën Fjala se gjatë ditës së enjte personalisht është interesuar për këtë çështje në disa pika të karburanteve dhe në to punëtorët e kanë konfirmuar se që tre muaj nuk kanë marrë pagë.

“Kemi hyrë në muajin e tretë në të cilin punëtorët e Al Petrol nuk i kanë marrë pagat. Të enjten ne kemi marrë një aktivitet dhe i kam kontaktuar gjashtë pika të AL Petrolit, në nivel të Kosovës, dhe për gjashtë pikat gjendja është e njëjtë”, ka thënë Azemi për Gazetën Fjala.

Ai bëri të ditur se në kompaninë Al Petrol ka të punësuar, të cilët që katër vite e gjysmë nuk i kanë nënshkruar kontratat e punës.

“..pjesa dërrmuese e punëtorëve që unë kamë biseduar me ta, ma tepër janë pa kontrata se sa me to”, ka thënë Azemi.

Kreu i Sindikatës së punëtorëve thotë se prapa kësaj kompanie qëndrojnë njerëz që janë të kyçur në politikë.

Azemi thotë se vazhdimisht kanë ofruar dëshmi edhe në Inspektoratin e Punës, mirëpo ata asnjëherë nuk kanë vepruar.

“..problemet lidhur me këtë çështje asnjëherë nuk janë zgjidhur nga Inspektorati I punës, u kam ofruar atyre argumente të bollshme që tregojnë për këto shkelje”, thotë ai.

Azemi shprehet se punëtorët e kësaj kompanie nuk guxojnë t’i kërkojnë pagat e tyre, se në momentin që i kërkojnë ata ato, largohen nga vendi i punës.

“… ti mbajsh punëtorët pa kontrata pune, tu thuash haptazi nëse kërkon pagën tënde, ti jap parat por nesër shkon në shtëpi, kjo është shkelje e hapur”, thotë kreu i Sindikatës së Sektorit Privat të Kosovës

Ndërkohë, Gazeta Fjala, ka raportuar edhe më parë se si kjo kompani ua kishte shkelur të drejtat e punëtorëve duke u ka ndal nga 5 për qind të pagës së muajit dhjetor të vitit të kaluar./GazetaFjala/

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/analiza/biznesmeni-latif-kryeziu-le-punetoret-pa-paga/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala