Albin Kurti: Investimi në asfalt solli varfërinë

Autori:Avdyl Pajaziti

Ish kryetari i lëvizjes Vetëvendosje, Albin Kurti, në një diskutim të organizuar nga lëvizja FOL, ka hedhur akuza për politika të gabuara të zhvillimit ekonomik. Sipas tij, është neoliberalizmi si doktrinë që reduktoi tranzicionin në privatizim, zhvillimin në infrastrukturë dhe infrastrukturën në asfalt.

Lexoni më poshtë diskutimin e plotë në lëvizjen FOL:

Lëvizja FOL ka mbajtur sot diskutimin e radhës në kuadër të Forumit FOL Hapur, ku i ftuar ishte z. Albin Kurti, deputet i Lëvizjes VETËVENDOSJE!.

Petrit Zogaj nga Lëvizja FOL tha gjatë këtij diskutimi me të ftuarin do të bisedojmë mbi modelin e zhvillimit ekonomik të vendit, çfarë dialogu i duhet Kosovës si dhe çfarë sipas z. Kurti përmban ideja e Republikës së Tretë, të cilën ka një kohë që e ka përfshirë në diskursin publik. Gjithashtu do të diskutojmë edhe për zhvillimet brenda Lëvizjes Vetëvendosje, në raport me ndryshimet në lidership, pastaj qasjen e opozitës përballë Qeverisë PDK-LDK.

Ndërkaq, Albin Kurti tha se varfëria dhe papunësia nuk janë pasojë e historisë së pasur të popullit, e pasurive të  varfra të vendit apo e kulturës së papërshtatshme të shoqërisë, por vetëm dhe vetëm e orientimit dhe modelit të gabuar ekonomik. “Pra, varfëria dhe papunësia në Kosovë nuk mund të shpjegohen me okupimin e gjatë që e kishim, me burimet e naftës që nuk i kemi apo me dembelinë që njerëzit e kanë, por, me instalimin e neoliberalizmit si doktrinë që e reduktoi tranzicionin në privatizim, zhvillimin në infrastrukturë dhe infrastrukturën në asfalt”, deklaroi ai, duke shtuar se sektori privat duhet ndihmuar nga shteti që të përparojë dhe ai duhet inkurajuar që të prodhojë në sektorin  bujqësor, zejtar, industrial.

Sa i përket dialogut me Serbinë z. Kurti tha se ne kemi nevojë për dialog me serbët e Kosovës për zhvillim të përgjithshëm me barazi për secilin, dialog që është i hapur e demokratik e jo i mbyllur e diplomatik sikurse ai në Bruksel me Serbinë. “Dialogu aktual është dialog prej lartë me marrëveshje që do të dështoj këtu poshtë̈. Ne kemi nevojë për dialog e marrëveshje prej poshtë̈. Ne mund të flasim me serbët e Kosovës edhe për shtetin e Serbisë̈, mirëpo ne nuk duhet të flasim me shtetin e Serbisë̈ për serbët e Kosovës”, tha ai.

Ndërkaq, sa i përket Republikës së tretë, z. Kurti tha se “ne kemi nevojë për një̈ Republikë të Tretë, për Republikë të zhvillimit, për Republikë që bëhet më parë sesa që shpallet. 15 vjet populli i Kosovës i provoi qeveritë̈ e djathta dhe tash po detyrohet të ik nga vendi ose të protestojë kundër qeverisë Duhet provuar social-demokracia, duhet provuar një qeveri e majtë.

  1. Kurti foli dhe për Gjykatën Speciale ku theksoi se një gjykatë më shumë nuk do të thotë më shumë drejtësi në Kosovë, dhe se sipas tij, nuk është e mundur që Këshilli i Sigurimit i OKB-së të krijojë Gjykatën Speciale pasi që fillimisht do të duhej të merrej me UNMIK-un.

Shtetin e kapur të Kosovës, sipas z. Kurtit e vërejmë më së shumti në veprimet ose mos veprimet e Prokurorisë dhe Gjykatave në Kosovë, me shkeljet më të mëdha të Kushtetutës që është duke i bërë Qeveria e Kosovës.

Sipas z.Kurtit Lista Serbe ka krijuar një lloj të vetos për vendimet që duhen të merren në Kosovë dhe se integrimi i saj në Qeverinë e Kosovës është integrim i Serbisë në shtetin e Kosovës.

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/albin-kurti-investimi-ne-asfalt-solli-varferine/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala