A4 dhe A5 i KEK-ut dalin nga sistemi

Autori:Avdyl Pajaziti

Jashtë prodhimit edhe njësia A4 në KEK, KEDS importon edhe më shumë energji elektrike
Korporata Energjetike e Kosovës është duke prodhuar pa dy blloqet A4 dhe A5.

KEDS-i përmes një komunikate për media ka njoftuar se KEK-u pa paralajmërim i ka ndërprer punët e blloqeve.

“Ditë më parë jemi informuar për ndërprerjen e paparalajmëruar të njësisë A5 në termocentralin Kosova A të KEK-ut dhe që kjo njësi do të jetë jashtë prodhimit për 10 ditë. Sot nga KEK-u jemi informuar edhe për ndërprerje të prodhimit në njësinë A4 të KEK-ut.

Momentalisht, përkundër planifikimit paraprak dhe bilancit energjetik të aprovuar nga Ministria e Zhvillimit Ekonomik, sistemi energjetik në Kosovë ka mungesë prodhimi, që vjen edhe nga dy njësitë e Kosovës A që për momentin janë jashtë funksionit.

Në punë janë vetëm dy njësitë në termocentralin Kosova B. Nga KEK-u jemi informuar që janë duke bërë të pamundurën që të sanojnë problemin në njësinë A4 dhe pritet që kjo njësi të kthehet në prodhim ditën e nesërme, deri sa ende janë duke punuar në rregullimin e avarisë në njësinë A5.

Ndërprerje të tilla, sipas KEDS-it, të paplanifikuara shkaktojnë vështirësi në furnizimin me energji elektrike për konsumatorë, duke qenë se në sektorë të rregulluar publik çdo devijim nga cilido operator, shkakton probleme në funksionimin e rregullt të sektorit energjetik dhe në planifikim.

Në momentin që është njoftuar, KEDS ka filluar procedurat për realizimin e importit të nevojshëm për furnizim me energji elektrike për 10 ditët në vijim.

Mirëpo, në raste të tilla të paparalajmëruara dhe të paplanifikuara, importi emergjent kërkon kohë për t’u realizuar, meqenëse si proces nuk varet nga KEDS. Për më shumë, një proces i tillë kërkon disponueshmëri të mjaftueshme të energjisë për import në treg, që jo gjithmonë është e gatshme në momente të paplanifikuara.

Në përfundim, KEDS është duke bërë maksimumin që kjo avari në KEK të mos ndikojë në përditshmërinë e konsumatorëve”, njofton KEDS-i./Indeksonline/

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: https://gazetafjala.com/a4-dhe-a5-i-kek-ut-dalin-nga-sistemi/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala