Protesta mund të keqpërdoret nga grupe të caktuara

Autori:Gazeta Fjala

ramadan qehaja

Qehaja thotë se ka mundësi që aty-këtu të hyjnë njerëz në grupin e protestuesve për ta keqpërdorur protestën dhe për të shkaktuar dhunë.

Eksperti i çështjeve të sigurisë, Ramadan Qehaja, ka thënë se protesta e paralajmëruar për sot nga opozita duhet të jetë e qetë. Në një intervistë për “Epokën e re” ai u ka bërë thirrje të gjitha palëve të jenë syçelë në mënyrë që protesta të mos eskalojë në dhunë.

“Mendoj se protesta duhet të jetë e qetë. Kuptohet se opozita ka të drejtë të organizojë protestë për çështje të ndryshme. Mirëpo, bazuar në gjendjen momentale politike, ekonomike, të sigurisë si dhe rrethanat në të cilat gjendemi, para së gjithash në raport me Serbinë, çdo tentativë e çdokujt që protesta të eskalojë, do t’i dëmtojë shumë rënd imazhin dhe stabilitetin e Republikës së Kosovës”, ka deklaruar Qehaja, duke shtuar se të gjithë duhet të kenë kujdes të mos vijnë deri te shkaktimi i dhunës, në mënyrë që të mos krijohet një gjendje kaotike.

“Syçelëtësia që të mos ndodhë dhuna duhet t’u përkasë të gjithëve. Para së gjithash, t’i përkasë opozitës e cila ka të drejtë të organizojë protestë, por edhe strukturave të tjera shtetërore të cilat duhet të jenë në mbrojtje të institucioneve tona. Do të thotë, duhet të kenë kujdes të mos vijnë deri te shkaktimi i dhunës, në mënyrë që të mos krijohet një gjendje kaotike e cila edhe mund të ndodhë”, ka vlerësuar Qehaja.

Ai ka thënë se ka rrezik që persona të caktuar mund të hyjnë në mesin e protestuesve për ta keqpërdorur protestën por, sipas tij, edhe opozita edhe policia duhet të jenë syçelë në këtë drejtim.

“Në rrethanat në të cilat gjendemi, pra duke pasur parasysh kush vepron këtu në Kosovë dhe çfarë forcash destruktive ka të shërbimeve të huaja inteligjente që veprojnë këtu dhe funksioneve të tjera që nuk na duan të mirën si shtet, atëherë ka mundësi që aty-këtu të hyjnë njerëz në grupin e protestuesve për ta keqpërdorur protestën dhe për të shkaktuar dhunë. Prandaj, çdonjëri, qoftë opozita, qoftë organet e tjera institucionale, e kanë obligim të jenë shumë syçelë në mënyrë që të mos vijnë deri te dhuna”, ka thënë Qehaja.

Sipas tij, në përgjithësi në Kosovë situata e sigurisë është mjaft e brishtë për shkak të problemeve me të cilat po ballafaqohemi si shoqëri. (politiko.net)

 

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: http://gazetafjala.com/protesta-mund-te-keqperdoret-nga-grupe-te-caktuara/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala