Për tre vite, gjykata dënon 5828 persona për vjedhjen e energjisë

Autori:Gazeta Fjala

rryma

Vjedhja e energjisë në Shqipëri zuri një volum të madh ne veprat penale për vjedhje në tre vitet e fundit. Prokuroria e Përgjithshme ka raportuar në Kuvend se gjatë tre viteve të fundit 5828 persona u ndoqën penalisht se kishin vjedhur energjinë. Dosjet penale të energjisë duket se kanë rezultuar të suksesshme pasi gjykata ka dhënë dënime për të gjithë personat që janë denoncuar për vjedhje energjie.

Sipas të dhënave të prokurorisë në vitin 2016 u ndoqën penalisht se kishin vjedhur energjinë 1237 persona, një numër realitivisht me pak se më 2014 -2015, ku ishin mbi 2000 të tillë pasi aksioni  kundër vjedhjeve të energjisë ishte në kulmin e tij.

Nga totali i dënimeve për vjedhje më 2016, 42 për qind ishin për energjinë elektrike.

Në vitin 2015 ishin proceduar për vjedhjen e energjisë 2082 persona dhe ishin dënuar 2115 persona, një numër më i lartë se procedimet. Ndërsa në vitin 2016 u proceduan penalisht 1276 persona për vjedhje energjie dhe u dënuan 1144 persona, për shkak se barra e provës në këtë segment të vjedhjes ka qenë me e lehtë.

Për vjedhjet e tjera dënimet në raport me procedimet kanë shumë hendek në raporte. Nga 10056 vjedhje të proceduara kanë përfunduar me dënim në gjykatë vetëm një e dhjeta ose 1345 raste.

Qeveria shqiptare ndërmori një aksion për arkëtimin me forcë të faturave të energjisë në vitin 2014 duke aktivizuar edhe policinë e shtetit. Nga ky aksion kompania e shpërndarjes së energjisë që kishte prekur falimentin nga administrimi CEZ tashmë është në fitime miliona euro.

Fitimi i OSHEE arriti në 10.4 miliardë lekë më 2016. Pagesat e faturave kanë lehtësuar borxhet në sektor dhe kanë ndihmuar OSHEE-në të kryejë investime në rrjetin e shpërndarjes së energjisë.

tabela me vjedhjet

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: http://gazetafjala.com/per-tre-vite-gjykata-denon-5828-persona-per-vjedhjen-e-energjise/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala