LDK: Shpend Ahmeti keqmenaxhoi 80 mijë euro

Autori:Gazeta Fjala

shpend
Grupi i Asamblistëve të Lidhjes Demokratike e Kosovës në Kuvendin e Prishtinës kanë rënditur një varg shkeljesh të kryetarit të Prishtinës Shpend Ahmeti.
Pesha e keqpërdorimeve sipas tyre, arrijnë në vlerë 80 mijë euro.
“Shpend Ahmeti dhe bashkëpunëtorët e tij për denigrimin e njerëzve që mendojnë ndryshe po bëhet me qëllim të zhvendosjes së vëmendjes të qytetarëve nga problemet dhe keqpërdorimet serioze të qeverisë të Komunës së Prishtinës”, thuhet në kumtesën e këshilltarëve të LDK-ës.
Sipas tyre të gjeturat e Auditorit të Përgjithshëm për Komunën e Prishtinës gjatë vitit 2015 janë të shumta. LDK-ja i është referuar disa  të gjeturave që kanë të bëjnë edhe me parregullsitë e identifikuara në ndarjen e subvencioneve për persona fizik dhe juridik.
“Kjo krijon bazën e dyshimit për vepra penale të kryera nga kryetari i komunës me rastin e nxjerrjes së vendimeve për ndarje të subvencioneve, sepse bëhet fjalë për shkelje procedurale dhe materiale për 13 përfitues të subvencioneve për projekte në vlerën prej 79,868  euro”, thotë Grupi i Këshilltarëve të LDK-së.

Këto janë të gjeturat e Auditorit të cilave u është referuar LDK-ja:

Në rastin e përkrahjes së projektit “Studimi i florës dhe faunës në parkun Gërmia” në vlerë totale prej 15,000 € për dy persona, pagesave nuk i kanë të bashkangjitura: rekomandimin, kërkesën formale, projektin dhe raportin kthyes. Për më tepër, kontrata është lidhur pas përfundimit të studimit. Qëllimi i shpenzimit ishte shpallja e parkut të Gërmisë si pejzazh i mbrojtur kategoria 5, që nuk përkon me qëllimin e subvencionimit sipas rregullores.

Pagesa për “ETEA” në vlerë 5,000€ ishte bërë në muajin gusht, edhe pse projekti – Dita botërore e muzikës në Prishtinë ishte realizuar në muajin qershor.

Një shumë prej 1,000 € i është dhënë subvencion për botimin e një libri në llogarinë personale të përfitueses. Përfituesja e subvencionit nuk është banore e Prishtinës.

Kryetari kishte marr vendim për subvencionim të orkestrës kamertale në vlerë prej 10,000€, edhe pse kërkesa nga orkestra kamertale ishte 5,940 €. Për më tepër, është kërkuar mbulimi i shpenzimeve të mëditjes për 25*50 € (1250 €), akomodimi, biletat, telefonat, reklamat etj., dhe pagesa e këstit të parë nuk ka të bashkangjitur raport kthyes.

OJQ Artpolis ishte subvencionuar me 3,500 € për mbajtjen e festivalit FEMFEST. Ekzekutimi i projektit nuk ishte kryer brenda afatit. Në këso raste, me kontratë parashihet ndërprerja dhe kthimi i parave.

Komuna kishte financuar “OVL-UÇK” në vlerë 2,350 € për projekte që kishin përfunduar. Subvencioni ishte kërkuar për shënimin e 18 Prillit – Ditës së Dëshmorëve të Komunës, ndërsa pagesa ishte bërë në muajin qershor.

Në rastin “APK” – 4,000 € për organizimin e panairit të librit 1-6 qershor të këtij viti, komuna kishte marr vendim dhe kishte lidhur kontratë me vonesë dhe pagesa ishte bërë në muajin e shtator, pasi që projekti kishte përfunduar.

Në dy pagesa prej 13,000 € për klubin hendbollistik “Prishtina”, mungon rekomandimi i komisionit, kërkesa formale dhe raporti kthyes.

Me rastin e subvencionimit për “Sport Marketing“ në vlerë prej 10,000 € për aktivizimin sezonal të liqenit të Gërmisë, komuna nuk kishte pranuar asnjë projekt, rekomandim nga komisioni, e as nuk kishte marrëveshje me përfituesin. Qëllimi i pagesës është mbulimi i borxheve për shkak të vështirësive financiare të kësaj kompanie që nuk përputhet me qëllimin e subvencionimit sipas rregullores.

Subvencionimi për ekskursionin e shërbyesve civil në Durrës/Shqipëri në vlerë 5,000€ për shpenzime të akomodimit dhe transportit, nuk përputhet me qëllimin e subvencionimit.

Për pagesën prej 10,000 € për teatrin Dodona nuk ka projekt, nuk ka kërkesë, rekomandim të komisionit  dhe vendimi është për vlerën 20,000 €, ndërsa pagesa është e pjesshme.

Me rastin e subvencionimit për shoqatën e filozofëve të Kosovës në vlerë 1,000 €, pagesa ishte bërë pas përfundimit të ngjarjes dhe nuk ka raport kthyes.

Me dy pagesa në vlerë 18,000 € komuna e kishte subvencionuar kompaninë Trafiku Urban për shpenzime të naftës, paga të punëtoreve dhe borxhe tjera. Lënda nuk ka të bashkangjitur rekomandimin e drejtorisë përkatëse, kontratën apo një raport kthyes për paratë e harxhuara.

Këto të dhëna për keqmenaxhimin e parasë publike janë vetëm disa nga arsyet që kryetari i Prishtinës, deri më sot nuk u ballafaqua me Kuvendin e Komunës, sepse keqmenaxhimi dhe dështimet e vazhdueshme gjatë qeverisjes tre-vjeçare nuk është lehtë të arsyetohen para këshilltarëve dhe opinionit të gjerë.

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: http://gazetafjala.com/ldk-shpend-ahmeti-keqmenaxhoi-80-mije-euro/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala