Kush po i mban mbyllur kosovarët?

Autori:Zekirja Shabani

vizat2-1

Selisë së Bashkimit Evropian në Prishtinë iu zu dera ditën e hënë nga një grup studentesh të Universitetit të Prishtinës.

Kërkesë të vetme ata kishin heqjen e vizave.

Por jo të gjithë mendojnë se BE është fajtore e mos heqjes së vizave për kosovarët.

Xhavit Drenori, nga Iniciativa Qytetare mendon se korrupsioni dhe mos sundimi i ligjit në Kosovë është shkaktar kryesore i izolimit të tërë qytetareve.

“Bashkimi Evropian e di që sistemin gjyqësor e kemi jo funksional. BE-ja, nuk është ka e thotë një gjë të tillë shumë konkrete. Por mos sundimi i ligjit dhe korrupsioni në vend janë shkaktar kryesorë që ne nuk po mund të lëvizim lirshëm e për këtë pa faj nuk është klasa politike”, tha për inFokus Drenori.

Nga ana tjetër, publicisti dhe njohësi i proceseve të integrimeve evropiane, Daut Dauti, vlerëson se  protesta për heqjen e vizave mund të merret vetëm si shprehje e pakënaqësisë dhe revoltës kundër Unionit Evropian.

Por, sipas tij, për viza dhe shumë çështje tjera vendosin shtetet anëtare të kësaj bashkësie në mënyrë individuale.

“Ndonëse studentët kanë të drejtën e tyre legjitime të protestojnë, nuk mendoj se kjo është rruga efikase për të gjetur zgjidhjen e çështjes së vizave pasi BE, nuk është adresa e saktë ku zgjidhet ky problem dhe studentët do të duhej ta dinin këtë gjë”, tha Dauti për inFokus.

Edhe njohësi i çështjeve politike, Imer Mushkolaj mendon se studentët dhe qytetarët tjerë duhet kërkuar fajet tek institucionet e vendit.

Ai shtoi se janë humbur shumë vite duke u përplasur për disa gjëra që do të duhej të ishin kryer vite më parë.

“Tri vjet i kanë humbur vetëm me demarkacion e përplasje politike. BE, e ka pjesën e vet të përgjegjësisë sa i përket vendimmarrjes politike, por institucionet e vendit është dashur t’i kryejnë punët me kohë, sidomos të intensifikojnë luftën kundër korrupsionit dhe krimit të organizuar”, tha Mushkolaj. /Gazeta inFokus/

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: http://gazetafjala.com/kush-po-i-mban-mbyllur-kosovaret/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala