Kosova pas Vjenës, nuk duhej t’i pranonte bisedime politike

Autori:Jakup Krasniqi

Jakup-620x330

Nga viti 2012, në Bruksel janë zhvilluar bisedime politike, që nuk do të duhej të fillonin. Arsyetimi për fillimin e atyre bisedimeve, jo vetëm një herë por është thënë shumë herë atëherë nga Kryeministri i atëhershëm, Thaçi që sot është Kryetar i Kosovës, jo pak herë na është thënë: “Se për bisedimet politike e ka mbështetjen e Uashingtonit, pra të SHBA-së e të Brukselit”! Rezultati i atyre bisedimeve, pas pesë viteve të gjithëve na është më shumë se i njohur. Është dështim i plotë i palës sonë në ato bisedime, për faktin se pala jonë në Bruksel është shkuar me duar në xhepa, që do të thotë është shkuar pa asnjë përgatitje as politike e as profesionale?! Pse ka ndodhur kjo, vetëm ata që  i kanë udhëhequr ato bisedime e dinë!

Një gjë duhet ta dinë secili politikan në Kosovë, se ecja në rrugën e kaluar një herë, në rrugën që nuk ka dhënë ndonjë rezultat në konsolidimin e shtetësisë së Kosovës, nuk jep rezultat tjetër veç dështimit. Kosovës i duhen suksese e jo dështime! Pastaj të gjithë duhet ta dimë se: pas bisedimeve të Vjenës (2006/2007), pas shpalljes së Pavarësisë më 17 shkurt 2008, në koordinim të plotë me faktorin ndërkombëtar, ku SBA-ja kishte rrolin e saj goxha përcaktues, e sidomos pas verdiktit të Gjykatës Ndërkombëtare të Drejtësisë i dhënë më 22 korrik 2010, Kosovën askush nuk e obligonte që të zhvillonte bisedime politike me Serbinë. Ishte Rezoluta e Asamblesë së Përgjithshme e OKB-së që kërkonte Bisedime teknike me ndërmjetësimin e Brukselit (BE-së), por jo bisedime politike. Unë nuk e di se ka qenë ndonjë instancë ndërkombëtare që e ka obliguar  vendin tonë që të zhvilloj bisedime politike?! Nëse ka le të bëhet publike.

Ne një situatë të tillë, Kuvendi i Kosovës dhe Qeveria e dalë nga ai duhet ta sqarojnë një herë e mirë çështjen, pse dhe si filluan Bisedimet Politike Kosovë – Serbi, pas kompromisit të madh që Kosova kishte bërë në Bisedimet e Vjenës? Atëherë kompromisi u bë për Pavarësinë e Kosovës! Bisedimet e Brukselit nën cilin presion u bënë? Në interes të kujt u bë kompremitimi i madh i Brukselit? Të  Kosovës  apo të individit? Vetëm pasi të sqarohen këto pyetje e shumë të tjera dhe të bëhen përgatitjet e duhura me konsensus nacional, me njerëz që dinë e duan të arrijnë përfundime që i duhen vendit e paqes në rajon, të rifillojnë bisedimet pa e kapërcyer as edhe një shkronjë të Dokumentit të Presidentit Ahtisari. I cili dokument komuniteteve pakicë e sidomos komunitetit serb, u jep kompetenca që kalojnë çdo standard ndërkombëtar për komunitete.

Se fundi, çdo ngutje nga cilido udhëheqës i Kosovës dhe çdo presion që mund vjen nga jashtë, nuk mund të zgjidhë asnjë problem real, veçse krijon e ndërlikon situatën politike në rajon dhe kjo si duhet askujt! Ndërsa thirrja që bënë zyrtarët e Brukselit se: “duhet të heqin dorë të dy palët nga diçka” janë të pa drejta dhe nuk zgjidhin asgjë! Brukseli duhet të kërkoj nga Kosova, zbatimin e Dokumentit të Presidentit Ahtisari, por jo përtej tij!

Institucionet e Kosovës, drejtuesit e tyre, nuk kanë nevojë të kërkojnë ndihmë nga ata që i ndihmuan, por, të kërkojnë përgjegjësi nga vetja e tyre, nëse nuk dinë le ta kërkojnë ndihmën e atyre që dinë!

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: http://gazetafjala.com/kosova-pas-vjenes-nuk-duhej-ti-pranonte-bisedime-politike/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala