UÇK kishte 13 mijë ushtarë (Dokument)

Autori:Arjeta Shabani

uck-paga

As gjysma e veteranëve që marrin pensione në Kosovë nuk kanë qenë Ushtarë të Ushtrisë Çlirimtare të Kosovës.

Një dokument i ish-Shtabit të Përgjithshëm të UÇK-së, të cilin e posedon Gazeta Fjala, dëshmon se vetëm 13 mijë e 458 ushtarë e mbrojtën Kosovën gjatë luftës.

Kaq ishte numri i njerëzve të rreshtuar përkrahë Ushtrisë Çlirimtare të Kosovës, të ndarë në 11 zona.

Por, deri më tani, që nga përfundimi i luftës kësaj liste i janë shtuar edhe mbi 20 mijë “ushtarë” të tjerë. Aktualisht mbi 36 mijë persona në Kosovë, marrin pensione të veteranëve, shkruan Gazeta Fjala.

Zona që kishte më së shumti pjesëtarë ishte ajo e Llapit, me 4 mijë e 523 ushtarë, pasuar nga Zona e Drenicës dhe ajo e Pashtrikut.

Ky dokument i hedhë poshtë edhe deklarimet e para disa dite të Kryeministrit Ramush Haradinaj.

“Nëse m’pyet mu sinqerisht, edhe sinqerisht po ta them, nifar mesatarje ku çdo vendbanim në zonën ku kam luftu është mobilizu e kanë marrë armë. Lirisht shifra del mbi 30 mijë veç në Dukagjin nën armë. Nën armë, tu bo roje, tu bo aktivitet, tu punu”, kishte deklaruar Haradinaj.

Por, sipas kësaj liste 30 mijë ushtarë nuk kanë qenë në tërë Kosovën, ndërsa ushtarë që kanë vepruar në këtë zonë janë vetëm 1 mijë e 537.

“Shtabi i përgjithshëm kishte 39 pjesëtarë, Zona e Drenicës 2 mijë e 611, Zona e Pashtrikut 1 mijë e 715, Zona e Dukagjinit 1 mijë e 537 dhe Zona e Shalës me 1 mijë e 253 ushtarë”, thuhet në listën e pjesëtarëve të UÇK-së, një kopje të së cilës e ka siguruar Gazeta Fjala.

Ndër zonat që kishin më së paku pjesëtar renditen “Qendra Shkollore”, “Brigada 200 e Logjistikës” dhe “Batalioni 1/60.”

26913985_10214813548481152_244105970_n

Kreu i veteranëve: Në luftë ishin 20 mijë ushtarë

Se UÇK nuk kishte numër kaq të madh të ushtarëve, e ka pranuar për Gazetën Fjala, edhe kreu i Shoqatës së Veteranëve të Kosovës, Hysni Gucati.

Gucati ka thënë së gjatë kohës së luftës kanë qenë afro 20 mijë ushtarë. Por, kur është pyetur se pse kjo listë nuk po merret parasysh në verifikimin e veteranëve, ai ka thënë se për këtë duhet t’i pyesni komandantët.

“Unë nuk jam përgjegjës, pyetni Komandantët e komisionet”, ka deklaruar Gucati për Gazetën Fjala.

Gazeta Fjala ka provuar të kontaktojë edhe me ish-Shefin e Shtabit të Përgjithshëm të UÇK-së, Agim Çekun që ta pyesë për këto lista që janë të nënshkruara nga vetë ai, por ai ka qenë i pa qasshëm.

Por, ndonëse Zona e Llapit kishte më së shumti ushtarë, për nga armatimi i rëndë gjendet në fund të listës. Për armatim të rëndë prin Zona e Dukagjinit.

E tërë Ushtria Çlirimtare e Kosovës kishte 383 armë, të cilësuara si armatim i rëndë, prej të cilave 253 gjendeshin vetëm në Zonën e Dukagjinit. Në këto armë përfshiheshin: lloje të mitralezëve, topave, minahedhësve dhe laserëve.

Aktualisht, 36 mijë veteranë çdo muaj marrin 6.1 milionë euro nga buxheti i shtetit, apo 73.5 milion euro në vit./Gazeta Fjala/.

Lista e pjesëtarëve të UÇK-së

Shtabi i Përgjithshëm-      39 pjesëtarë

Zona e Drenicës –          2611 pjesëtarë

Zona e Pashtrikut-          1715 pjesëtarë

Zona e Dukagjinit-          1537 pjesëtarë

Zona e Shalës-                1253  pjesëtarë

Zona e Llapit-                   4523 pjesëtarë

Zona e Nerodimes-           1253 pjesëtarë

Zona e Karadakut-             347 pjesëtarë

Batalioni 1/60-                    110 pjesëtarë

Qendra Shkollore-                30 pjesëtarë

Brigada 200 e Logjistikës-   40 pjesëtarë

UÇK-                               13458  pjesëtarë

 

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: http://gazetafjala.com/analiza/uck-kishte-vec-13-mije-ushtare-dokument/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala