Alarmante: Prishtina, qyteti ku duhet jetuar me gazmaska!

Autori:Zekirja Shabani

Mjegulla-Prishtine-690x458-650x358

Kryetari i Prishtinës, Shpend Ahmeti, ka bërë të ditur se në gjashtë lagje të kryeqytetit do të bëhet matja e cilësisë së ajrit, në kohë reale.

“Tanimë, komuna e Prishtinës mat cilësinë e ajrit në 6 lagje të Prishtinës në kohë reale. Gjatë javëve në vijim do të përmirësojmë statistikat. Me këto pajisje të sofistikuara do të masim monoksidin e karbonit, CO2, pluhurin, radioaktivitetin etj”, ka shkruar sot gjatë ditës kryetari i Prishtinës në Facebook.

Por sa në të vërtetë është i ndotur ajri në kryeqytetin e Kosovës, Prishtinë?

Sipas të dhënave që jepen në linkun ku pasqyrohet niveli i ndotjes së ajrit në Prishtinë, mund të shihen shifra alarmante të ndotjes së ajrit.

Për t’i parë këto të dhëna, klikoni KËTU

E sipas kryetarit të Partisë së Gjelbër të Kosovës, Daut Maloku, Prishtina, si kryeqendër e Kosovës, ka nivel mjaft të lartë të ndotjes së ajrit.

Maloku vlerëson se problemi i ajrit është mjaft i theksuar, gjë e cila vjen kryesisht si pasojë e Termoncetralit dhe makinave në numër të shumtë në qytet.

“Prishtina gjendet në një distancë pesë kilometra nga Termocentrali (KEK), i cili tash për tash është ndotës më i madh i ambientit në Kosovë”, ka thënë Maloku për Telegrafin.

Ai ka shtuar se ka mjaft imitim të gazrave nga djegia e linjitit ku ka deponi të hapura të pluhurit e cila vjen si shkas i mbetjes nga djegia e qymyrit, linjitit etj.

Ai gjithashtu konsideron se problem tjetër i ndotjes së ajrit në Prishtinë është edhe si pasojë e transportit rrugor – nga automobilat.

“Diku 80.000 makina lëvizin gjatë ditës në hyrje dhe dalje të kryeqytetit. Ndërgjegje të qytetarëve s’ka. Po ashtu edhe makinat e vjetra e rëndojnë shumë cilësinë e ajrit në Prishtinë”, tregoi ai duke cilësuar këtë fenomen si mjaft të rrezikshëm për banorët e Prishtinës me rrethinë.

Maloku ka bërë të ditur se specialistët ndërkombëtarë qysh në vitin 2000 kanë ardhë me një konstatim sa i përket ajrit të ndotur duke quajtur një fenomen që paraqitet tek banorët e Prishtinës “Kolli i Prishtinës”.

“Prishtina e ka një kollitje specifike që vjen nga djegia e qymyrit që ndryshe quhet ‘Kolli i Prishtinës’. Ato grimca milimetrike e irritojnë kanalin e frymëmarrjes”, tha ai.

Ndryshe, Maloku theksoi se çështja e rregullimit të kësaj gjendje është paraparë me standardet Europiane.

“Në fakt jemi shumë larg me Evropën në këtë aspekt. Financimet më të mëdha Bashkimi Evropian i ka për ambient, ngritjen e cilësisë së ajrit. Marrëveshja e Stabilizim Asociimit e përcakton si primare rregullimin e ndotjes së ajrit. Në kemi një marrëveshje kontraktuale me BE-në dhe aty adresohemi. Cilësia e ajrit sipas BE-së do të jetë primare. Shpresojmë që do të kemi presion të jashtëm tek qeveria jonë në këtë aspekt”, ka thënë Maloku për Telegrafin. /Telegrafi/

Vërejtje:

Ju keni të drejtë ta riprodhoni tekstin tonë, por me kusht që ta citoni burimin e Gazeta Fjala dhe kur ta publikoni shkrimin, ta integroni linkun e artikullit siç vijon: http://gazetafjala.com/alarmante-prishtina-qyteti-ku-duhet-jetuar-me-gazmaska-2/

Në të kundërtën, ne do të raportojmë tek organet kompetente si dhe pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin.

Redaksia e Gazetës Fjala